01 Ago SMLM2020: Apoiemos a lactancia materna por un planeta saudable

Un ano máis, a primeira semana de agosto as matronas celebramos a Semana Mundial da Lactancia Materna.

Con motivo da celebración da semana mundial da lactancia materna (SMLM2020), as matronas desde a FAME queremos unirnos un ano máis á campaña de promoción da Alianza Mundial para a Acción da Lactancia Materna (WABA, polas súas siglas en inglés), unha rede mundial de persoas e organizacións adicadas á protección, promoción e apoio da lactancia materna en todo o mundo.

A lactancia materna é sostible

O lema elixido este ano é “Apoiemos a lactancia materna por un planeta saudable”. A interrelación entre as persoas e o planeta require da procura de solucións sostibles que beneficien a ambos, e unha das cousas que están nas nosas mans é reducir as emisións de carbono e o impacto ecolóxico comezando por como alimentamos aos nosos bebés. 

Os nosos sistemas de produción de alimentos e patróns de consumo teñen un gran impacto negativo sobre a saúde dos ecosistemas da natureza. A lactación materna é natural, renovable e ambientalmente segura, ademais, cando falamos de lactancia directa ou extracción manual do leite materno contribúese á redución de refugallos e o aforro de enerxía e outros recursos. Cando se fai unha valoración sobre o impacto da produción de leite artificial, este proceso libera grandes cantidades de metano e outros gases de efecto invernadoiro. Ademais, os procesos de fabricación, envasado, distribución e preparación dos sucedáneos do leite materno necesitan enerxía e auga. Todo isto afecta o medio ambiente e, alimentar a un millón de bebés con fórmula durante dous anos require, en media, uns 150 millóns de latas de fórmula.

Obxectivos desta SMLM

• INFORMAR as persoas sobre a relación entre a lactancia materna e o medio ambiente/cambio climático.
• ANCORAR a lactación materna, como unha decisión climatolóxicamente intelixente.
• COMPROMETERSE con individuos e organizacións para un maior impacto.
• IMPULSAR accións para mellorar a saúde do planeta e das persoas a través da lactación materna.

Que podemos facer as matronas para promover a lactancia?

As matronas somos coñecedoras dos beneficios do leite materno e seguiremos traballando en todos os ámbitos de noso desempeño profesional para mellorar as taxas de lactancia materna: 

1. Facilitando asesoramento especializado en lactación materna ás familias que o necesiten nos centros de saúde e hospitais, e avogando pola asesoría sobre lactación materna como parte da educación maternal e da atención postparto.
2. Promovendo os grupos de axuda entre nais e asociacións de apoio á lactación e involucrando a todos os profesionais da saúde na promoción da lactación materna.
3. Investindo en programas de capacitación constantes cos diferentes niveis de profesionais da saúde, consultoras de lactación, persoal de saúde comunitaria e voluntarias/voluntarios comunitarios de apoio.
4. Facendo fincapé en técnicas de tratamento de leite materno: a extracción manual do leite materno, o uso apropiado dos extractores de leite cando sexa posible e seguro, o almacenamento e a preparación correcta do leite materno extraído, a alimentación con vaso/cunca, as técnicas para manter a produción de leite materno e a relactación, así como nos bancos de leite materno.
5. Difundindo mensaxes informativas e educativas sobre lactación materna a través das canles de comunicación á nosa disposición (publicacións en redes sociais, pósteres nas consultas, etc.)

Matronas e mulleres, unha vida xuntas

Unha cadea efectiva de apoio crea un ambiente propicio que empodera a todas as mulleres e as súas familias para aleitar de maneira óptima. A matrona é a profesional sanitaria máis próxima e propicia para facilitar información, axuda e acompañamento da lactancia. Por iso xuntas, familias e matronas, podemos lograr unha situación de beneficio mutuo para a nai e bebé, que repercutirá nunha mellora para a humanidade e o planeta.

Máis información en http://www.worldbreastfeedingweek.org