29 Set Charla “Partería e maternidade: unha viaxe entre culturas”
A AGAM organiza o vindeiro venres 2 de outubro en Santiago de Compostela un encontro intercultural arredor das diferentes formas de vivir e acompañar a maternidade.
A Asociación Galega de Matronas (AGAM), en colaboración con Enxeñería Sen Fronteiras Galicia e Mulleres Bravas, organiza o vindeiro venres 2 de outubro de 2026, ás 18.00 horas, na Casa Xohana Torres (Santiago de Compostela), a charla “Partería e maternidade: unha viaxe entre culturas”.
O encontro nace como un espazo para conversar, compartir experiencias e achegarse a diferentes formas de entender e vivir a maternidade, poñendo no centro o papel das parteiras e a importancia do acompañamento durante o embarazo, o parto e o posparto.
Na charla participarán Irune Valderrábano, matrona galega e historiadora, e Dilma Cruz, lideresa agraria e parteira hondureña, que dialogarán desde as súas experiencias e coñecementos sobre o acompañamento ás mulleres e ás súas familias en diferentes contextos culturais e sociais.
Ao longo do encontro abordarase tamén como os contextos sociais, culturais e comunitarios inflúen na maneira de vivir as maternidades, así como as distintas prácticas, crenzas e formas de acompañamento que existen arredor do embarazo, o parto e o posparto.
Esta viaxe intercultural permitirá coñecer outras realidades, identificar puntos de encontro e reflexionar sobre o valor de acompañar cada proceso desde o respecto, a diversidade e a comunidade.
Desde a AGAM considérase fundamental xerar espazos de diálogo que permitan ampliar a mirada sobre a maternidade e a partería, recoñecendo a diversidade de experiencias e poñendo en valor os saberes e prácticas das parteiras en diferentes lugares do mundo.
O acceso á actividade é libre e gratuíto ata completar aforo. Para facilitar a organización e garantir a praza, as persoas interesadas poden realizar previamente a súa inscrición a través do formulario habilitado pola organización.
- Venres, 2 de outubro de 2026
- 18.00 h
- Casa Xohana Torres – Santiago de Compostela
- Acceso libre ata completar aforo, previa inscrición recomendada no formulario: https://forms.gle/UYsQZqWPSgqctBCK9
Un encontro para escoitar, compartir e aprender doutras formas de acompañar e vivir a maternidade.